01/
‘Ssu ventu

Quale serà ‘ssu ventu ?
Chì soffia in u nostru pratu
Un’ora di paura
O un buffulu di sperenza

Ellu serà spandicadore
O creatore d’un avvene
Empiendu u nostru core
D’allegria o di dulore

Ellu serà caldu
À brusgià u nostru mondu
O serà frescu
À purtacci un celu novu

Cù stu ventu infucatu
Schjarita hè sta ghjuventù
È d’un passu scurdatu
Rè hè u silenziu

Induv’hè ‘ssu raghju di sole
Chì facia sbuccià ‘ssi fiori
Rimorsu d’un paese
À campà cù d’altre valore

Ellu serà caldu
À brusgià u nostru mondu
O serà frescu
À purtacci un celu novu

F. Scanavino – J-L. Massey – F. Santucci © 2015 Cirnese


02/
Annu novu

Tù chì ghjunghji puntuale
È t’affachi spenseratu
Da tutti sè aspettatu
Per stancià u tempurale
Risanà u nostru male
È appacià u passatu

Sè u sonniu ideale
D’un avvene più sebiatu
Senza odiu ne peccatu
Ma solu piacè è sciali
Duve ferma tale è quale
U solcu di l’antenatu

Spalanca quì e to ale
Versu u celu bramatu
Ogni mumentu spannatu
Da un eternu fanale
D’amore tradiziunale
È rispettu incalcatu

Manteni u naturale
È l’estru aggalabbatu
Fà ch’ogni zitellu natu
Cù l’altri sia uguale
Sempre un corsu liale
À issa terra arradicatu

G-F. Terrazzoni – P. Agostinetti – F. Santucci © 2015 Cirnese


03/
U celu

À u celu chì pesa l’ore
À u sole ch’ellu ci manda
À sta vita chì vene avà
Ellu pianu s’arricumanda

Ma la sera quand’ellu hè
Stancu sì di a sarabanda
Face un sognu è da per sè
A speranza ellu a dumanda

Credici tù ci crede ellu
A l’amore quand’ellu c’hè
Quessu hè l’avvene u più bellu
Per ellu, per tutti è per tè

A so strada senza fà nice
I so passi di menu male
Mai nimu ferà da sè
S’ellu pensa chì nunda vale

Credici tù ci crede ellu
A l’amore quand’ellu c’hè
Quessu hè l’avvene u più bellu
Per ellu, per tutti è per tè

G. Fusina – F. Santucci © 2015 Cirnese


04/
Pasturellu di San Pè

Quand’ellu spunta lu ghjornu
Cù la to musetta à collu
Ne pigli quelli stradelli
Chì longanu lu Cugnolu
Ai per solu cumpagnu
Lu to cane pediolu

I primi raghji di sole
Chì schjariscenu le muntagne
E calanche di San Petru
Induve ci dormenu l’altagne
Faci sente lu to fiscu
Tandu movenu le capre

Quandu lu to fiscu ribomba
Quassù per le calanche
Falanu a fuga serata
Elle chì ùn sò mai stanche
Sanu ch’ai l’allusingu
Sempre piattu in la to manu

Dopu fattu la meranda
Ti faci una sunnata
Nant’à un lettu di filette
Passi una bella stondata
À lu frescu castagninu
Ti faci anc’una cantata

È lu nostru pasturellu
Oghje si n’hè andatu
Soca versu d’altre cunfine
Induv’ellu hè più ripusatu
Quassù ci hè sempre u sole
Hè fiuritu lu so pratu
In ‘ssu pratu di virdura
Pasturellu ùn hè più solu
Quessa la sò di siguru
È ghjè cusì ch’eo mi cunsolu
Cù lu so cuginu Luisu
Stanu bè in paradisu…

M. Campana – J-L. Massey © 2015 Cirnese


05/
Malincunia

M’arricordu di ‘ssa machja
Cum’è mille soli, era luminosa
Maestosa natura abbandunata
È a terra, l’ai pigliata

In un paese era una vincighjata
In ‘ssu mondu s’hè sminticata
Nant’à e piazzette ùn si balla più a pizzica
È a cultura, l’ai arrubbata

Nant’à ‘ssi vechji banchi, a gioia di parlà la
In un cricchennu ella, si suffoca
Furiosa sintinella, d’una vita scurdata
È a nostra lingua, l’ai cundannata

Curagiosu, populu era
Di ‘ssa battaglia tante piaghje à sullivà
A to grande guerra, l’anu fatta
Ma a storia, l’ai scanciliata

In ‘sse muntagne l’acellu cantava
Mutu fubbe una ghjurnata veraninca
Ferita innucenta cum’è ‘ssa prima trinca
Ma a libertà, l’ai incarcerata

Nant’à ‘ssi vechji banchi, a gioia di parlà la
In un cricchennu ella, si suffoca
Furiosa sintinella, d’una vita scurdata
È a nostra lingua, l’ai cundannata

È a terra l’ai pigliata
A cultura l’ai arrubbata
È a storia l’ai scanciliata
È a libertà l’ai incarcerata

F. Scanavino – J-L. Massey © 2015 Cirnese


06/
Ti vulia dì

Ti vulia dì u tempu passatu in furia
Ti vulia fà scopre ‘ssu caminu di vita
Ti vulia dà lu mio batellu pè franca sta cunfina

Una notte mi sò discitatu, pensavà ch’è tù c’era quì
Accantu à mè pè guarisce le mio ferite
Sò statu innamuratu d’una fulena d’amore

Chì hà fattu batte lu mio core

F. Santucci © 2015 Cirnese


07/
Quand’ella si sveglierà

Inghjottatu da u mare
S’hè chjinatu u sole
Daretu à ellu ‘ssa trista realità
Annigatu pè infine scurdà

Silenziosu hè u celu
Di sperà, hè stancu
U ritornu di l’immaculata culomba
Pè schiarisce ‘ssa digrazia nera

Sullivà e muntagne pè truvà lu so caminu
Seguità u fiume pè capì lu so destinu
À l’alba d’una ghjurnata turmentata
Cuscenza abbandunata à l’uscure pensate
Quand’ella si sveglierà pè fà la ingrandà
Quallà a ghjuventù serà
Chjode l’ochji è sente lu so stintu
Francà a notte pè sunnià dumane
È circà ‘ssu prufume di lindumane
Senzà riflette ciò chì serà l’avvene

Sullivà e muntagne pè truvà lu so caminu
Seguità u fiume pè capì lu so destinu
À l’alba d’una ghjurnata turmentata
Cuscenza abbandunata à l’uscure pensate
Quand’ella si sveglierà pè fà la ingrandà
Quallà a ghjuventù serà

F. Scanavino – F. Santucci © 2015 Cirnese


08/
Ti daraghju

Ti daraghju a cuscenza
D’un lindumane più caru
Induve issu celu chjaru
Sarà a nostra partenza

Ti daraghju a passione
Chì mi fiurisce in pettu
Tale u versu dilettu
Di le più belle canzone

À tè, ogni pensata gradita
À tè, quessa gioia infinita
À tè, a speranza rinvivita

Ti daraghju a manera
Di pudè cresce inseme
Eppò l’emuzione streme
D’una passione sincera

Ti daraghju u surrisu
D’ogni sintimu beatu
Chì sarà sempre stampatu
A l’orlu di lu mio visu

À tè, u principiu d’un novu albore
À tè, a chjave di u mio core
À tè, per sempre quest’amore

G-F. Terrazzoni – F. Santucci © 2015 Cirnese


09/
Bianca è nera

Sò di piaghje, mare è monti
D’albore è di tramonti
In manu à l’omi pronti
À pruteghje case è ponti

Sò di l’eterne passione
À mille rivendicazione
U stema d’una nazione
Da appende à ogni balcone

Sò a spera d’una volta
A cuscenza chì và sciolta
È chì sempre si rivolta
Da ùn esse mai tolta

Sò di fede rinvivita
À l’andatura ardita
In vanu pruibita
Svintuleghju à l’infinita

Sò tessa di storia fiera
Di rispettu, di spartera
In core d’ogni ventera
À l’eternu bianca è nera

G-F. Terrazzoni – F. Santucci © 2015 Cirnese


10/
Pensà

Pensà à tutte ‘sse stonde beate
À tutti sti ricordi empiuti d’amore
Quand rivecu lu to sguardu
Lu to visu mi pare più bellu

M’ai datu u piacè di a vita
Un sintimentu d’eternità
Una raggiò di crede
Ch’è tù fù lu mio primu amore

È stà à sente la to voce
Carezzendu lu mo esse
Dendu mi a forza d’amà
A voglia d’amparà

U tempu passa ma mi ferma sempre
La to mente cù stu surrisu
Chì pò fà piantà l’ore d’una notte
Pè apre le so porte à un sognu eternu

F. Santucci – J-V. Servetto © 2015 Cirnese


11/
A musa di l’esse

Aghju spechjatu a mio mente
In l’acqua d’una surgente
Per pudè cunnosce a musa
Ch’in u mio core hè rinchjusa

Trà u trimuleghju di l’onda
C’era issa donna vagabonda
Una fata fatta d’arcanu
Chì mi pigliò per la manu

In a bughjura a seguitu
Longu à un chjassu secretu
Trà la fede è u timore
Hè per mè u solu albore

M’accarezza à l’ispensata
Di fantasia incantata
Discitendu tutti i versi
Ch’in u mio capu si sò persi

G-F. Terrazzoni – F. Santucci © 2015 Cirnese


12/
Sò di quelli

Sò di quelli ch’anu tracciatu
Un chjassu fattu di spartera
Omi di passione sincera
Incù u stintu indiatu

Sò di quelli ch’anu stantatu
A richezza di quessa terra
Da fà ch’ùn si pianti a sfiera
Di u nostru tempu beatu

Sò d’una leva ch’ùn si tace
Incù u spiritu tenace
È più ch’è mai sò capace
À tesse l’avvene di pace

Sò di quelli ch’anu alzatu
Aldilà di ogni fruntiera
A voce eppò a bandera
Di un populu smisuratu

Sò di quelli ch’anu speratu
Incù a faccia alta è fiera
In un mondu di gioia vera
È di rispettu tramandatu

Sò d’una leva ch’ùn si tace
Incù u spiritu tenace
È più ch’è mai sò capace
À tesse l’avvene di pace
Sò di quelli…

G-F. Terrazzoni – P. Agostinetti – F. Santucci © 2015 Cirnese