Brama d’amore

Sò solu senza tè
Aghju a brama d’esse cun tè
U mio core tristu chì batte
C’era s’estate
Avia a passione d’amà
Ma cum’è dicenu l’amore hè ceccu
Alora ci simu lasciati
A libertà
Ti tengu cara zitelluccia
Si luntana di mè nant’à ‘ssa terra
Ma si prisente in mè
In lu mio core
Quellu chì ha fattu, u nostru amore
M’ai scanbiatu a mio vita
M’ai mustratu a strada
Cum’è un sognu chì core
È passendu cun tè, tutte ‘sse ore…

F. Santucci


Chì serà dumane ?

Chì serà dumane ?
À l’orlu di a vita
Chì serà dumane ?
Per un populu smaritu
Epica nera è sanguinosa
Chì hà strappata in pettu à i nostri fratelli
Amore è spartera
À l’oramai sminticati
Stà à sente e nostre voce
Stà à sente i to figlioli
Risenti ‘ssi lamenti
Affundati di suffrenze…
Suminemu u granu di a pace
Per fà chì dumane
‘Ssa lotta principiata
Trovi un sensu di verità
Sunniata più ch’è mai
Senza esse scunsulata
Amore di sempre
Amore d’una mamma
Quellu chì si cerca
Per la sempiterna, eternità
Cù a forza di perdunà
Cù la to sincera pietà
Fà schjarisce ‘ssu caminu
È lucicà lu to surrisu
D’un zitellu appena natu
Di a virtù chì l’annu datu
Un omu diventerà
Cun ‘ssu caminu di benestà…

A. Arrivabene


Eiu ti mandu

Eiu ti mandu nant’à l’onde
In lu batellu chì và
Incù parolle inturchinate
Dà lu mio portu quallà
Cù ‘ssu pezzucciu di fogliu
Fattu d’inchjostru di memoria
U mare ùn serà più ch’è oliu
Cù lu mio filu di scrittura
Eiu ti mandu, solu à tè
Oghje in ogni tempu chì si passa
A mio fede hè lu to sguardu
È in terra quallà
Ci hè lu mio amore suminatu
Eiu ti mandu, solu à tè
Pensendu à la to dolce pelle
Ti scrivu un testu chì ti vale
È ti dumandu in ‘sse parolle
Imprestammi le to ale…

J-L. Massey


Infernu

Da le to mane O fratellu
M’ai purtatu l’infernu
I mio lamenti da lu celu
I senterai per l’eternu
In ‘ssa ghjurnata istatina
Un diavule chì s’avvicina
Chì brusgia cù lu so calore
I to pulmoni, lu mio core
Sò a furesta addisperata
Di a nostra terra ruvinata
I paisoli sempre in dolu
Da a malasorte d’un figliolu
Vogliu chì le mio lacrime
Spinghjenu tutte le fiamme
Chì portenu quessu malore
Ci empienu, di dulore
Ùn fate male à ‘ssu cecu
Oghje per ellu eiu pregu
Per fà ritruvà la mente
È la so fede mai spente
Sò quessa machja addulurata
Chì da lu focu incadenata
Ind’è lu fume s’addispera
Avà ormai eiu ùn sò ch’è cera
Ti lampu una chjama O ghjuventù !
Per avanzà in ‘ssu cumbattu
Cun fedeltà è cun curagiu
Fà rinvivisce lu mio messaghju
Per un avvene più felice
Senti ‘ssu cantu chì ti dice
« Ùn pienta mai di luttà
È la furesta camperà »
Sò a furesta addisperata
Di a nostra terra ruvinata
I paisoli sempre in dolu
Da a malasorte d’un figliolu

I. Bourdiec


L’albore

Nant’à a piazza di a scola
Si prumena una zitella
Cum’è hè grande a so dulcezza
Tutti i mio guai diventenu carezza
Accantu à tè, tuttu hè tenerezza
È ‘ssa canzona vale una richezza
È quand’ellu spunta u sole
Sentu in mè nasce mille fole
Sopr’à u paese pascenu e mufre
In fiuminale ogni pozzu ci stà truite
In le muntagne vole l’altore
È hè sempre cusì dipoi l’albore
Quassù nant’à u Monte Cintu
Ci hè l’anima di u ricordu
Chì mughja a fraternità
Per un avvene d’eternità…
In Corscia di Niolu
Stà u mio bellu paesolu
Di a costa ne sò figliolu
È quandu sò turmintatu
Ellu mi piglia per la manu…

F. Santucci


L’esiliatu

Nanz’à un viaghju supranu
Mi ne sò andatu sempre luntanu
U mio paese di forza aghju lasciatu
Per vince un pezzu di pane furzatu
Di sta partenza ùn ristava ch’è pienti
Aghju lasciatu i mio cari parenti
N’aghju pigliatu per quarant’anni
Treni, aviò è batelli
Aghju lasciatu quallà la mio armunia
Per vive cum’è un strangeru
Cun tristezza è malincunia
Ma per mè un ghjornu l’esiliu s’arresterà
È ritruvendu i mei u mio core s’aprerà…

F. Santucci


Sò di ‘ssa terra

Sò di ‘ssa terra ribella
È di ‘ssa memoria guerriera
Sò di ‘ssu populu eternu
Sentu lu mio cantu sperendu
Camperà
A chjama di le to muntagne
Di li to fiumicelli d’oru
Per fà rinasce le valore
D’eri chì eranu tesoru
Libertà
Sentu una voce chì mi chjama
Dicendu veni à aiutà mi
A mio lingua si ne và
Avà ci vole à arrizà si
Cursichella
Oghje ti vecu sunnià
A ghjuventù piglià cuscenza
Chì l’anima ùn hè più avà
È ch’ellu si ne more u so campà
Terra mea
O Corsica la to fiamma
L’aghju in pettu cum’è un’alma
In fondu di lu mio core
Ti canterraghju sin’à more
Corsica

F. Santucci / J-L. Massey


Sognu

Un ghjornu aghju scuntratu
Davant’à un mare maestosu
Un sognu chì mi paria
Appena bughju
Mi sò arrizzatu
È aghju fighjatu
Quallà nant’à u sole chì si pesa
Una storia s’hè fatta per fà cresce u culore
Di lu mio core
È aspettendu e fiamme mai spente
Di l’amore
Sò u ventu chì mughja
Quassù versu a luna
A voce di l’amore
Chì serà sempre in bullore
Una notte sò cullatu
Versu un paradisu luntanu
Nant’à e stelle
Di a vita

F. Santucci


Stai accantu à mè

Ti purteraghju à lu fiume
Ricatarendu petrette bianche
Abbagliulerà ti cù u lume
Di u mio core chì si franche
Ci bagneremu in l’acque chjare
Duie carezze, basgi d’amore
À l’infine sin’à u mare
È po piantà ci duie fiore
Ùn lascia pienghje lu mio core
È stai accantu è mè
Lu to visu m’hè zuccatu
Per l’eternità
S’arrizzeremu à l’albore
Di ‘ssa ghjurnata à lu to fiancu
Ti purteraghju lu mo calore
À lu to corpu fattu d’oru biancu
Dopu riculleremu i fiumicelli
Per richjappà ci e care muntagne
Ascultendu u cantu di l’acelli
È cunfissà ti l’amore è le so fiamme

J-L. Massey


U tempu passa

Un figliolu hè natu in paese nostru
U tempu l’ha fattu zitellu vostru
Parenti è amichi ne sò tutti fieri
Di vede ingrandà stu ciucciu senza penseri
Da zitellu pianu pianu omu diventerà
In lu so paese la so piazza troverà
È cusì un ghjornu e granelle suminate
In l’ortu di a vita e rosule sbucciate
L’ore passanu senza mai arristà
L’omu ùn puderà mai fà le pientà
E simane, i mesi, per noi parteranu
Eri, oghje è dumane i ghjorni si n’anderanu

F. Santucci


Ùn pianteremu

Di st’arba maladetta
U nostru paese si techja
A ghjuventù di Cursichella
À ‘ssu vilenu corre anch’ella
Oghje hè tempu di finisce
Contr’à ‘ssu malore ci vole à reagisce
Quelli chì volenu tumbà
Anu da smarrisce
I nostri ghjuvani i faranu capisce
À la punta di l’acu ci hè l’infernu
È sti mulizzi lampemu li à caternu
Oghje ind’è u nostru core
Ghjè l’inguernu
Ma dumane vinceremu
Sta canzona hè fatta per tè
Chì vendi ‘ssa rubaccia
Stà à sente a mio ghjuventù hà da esse pura
Insemu cù i nostri pugni lotteremu
Per fà ti cascà in lu bughju eternu
Ùn avemu micca bisognu di a to droga
Per fà la campà
A nostra terra sarà una rivolta
Per mustrà a putenza ch’ella porta

F. Santucci